म्याग्दीको धवलागिरी गाउँपालिकाले आगामी आर्थिक वर्ष २०८०÷०८१ को नीति तथा कार्यक्रम र बजेटका लागि शनिबार सरोकारवालाहरुको सुझाव संकलन गरेको छ ।
मुनामा आयोजना भएको कार्यक्रममा सहभागि पुर्व जनप्रतिनिधी, राजनीतिक दलका प्रतिनिधि, युवा क्लव, आमा समूह, गैरसरकारी संस्थाका प्रतिििनधी र अगुवाहरुले गाउँपालिकाको नीति तथा कार्यक्रम र बजेटमा समेटिनुपर्ने विषयमा सुझाव दिएका हुन् ।
सरोकारवालाहरुको अपेक्षा र आवश्यकता पहिचानका लागि सुझाव संकलन गरिएको गाउँपालिकाका अध्यक्ष प्रेमप्रसाद पुनले बताउनुभयो ।
“वस्ती, टोल, वडा हुदै कार्यपालिका अन्तरगतको विषयगत समितिहरुमा बजेट, नीति तथा कार्यक्रमको छलफल गरेका छौ,” उहाँले भन्नुभयो “गाउँपालिकाको योजना र कार्यक्रममा सरोकारवालाहरुको पनि अपनत्व बनाउनका लागि सुझाव संकलन गरिएको हो ।”
आगामी वर्षको योजना तथा कार्यक्रम र बजेटलाई गाउँपालिकाको समस्या र आवश्यकता सम्बोधन गर्न केन्द्रित हुने अध्यक्ष पुनले बताउनुभयो । सहभागीहरुले गाउँपालिकाको केन्द्र, वडा र बस्ती जोड्ने सडकलाई स्तरोन्नति गर्न, सुरु भएका अस्पताल, पालिका र वडा कार्यालयका अधुरा योजनालाई पूर्णता दिन, खानेपानीको सुविधा विस्तार गर्न, फोहोर व्यवस्थापन सम्बन्धी योजना बनाउन सुझाव दिएका थिए ।
यसैगरी जडिवुटी खेती, पशुपालन र पर्यटन क्षेत्रका साथै सामाजिक विकृति न्युनीकरण, शसक्तिकरण, गुणस्तरीय शिक्षा र स्वास्थ्यको लागि पहल गर्न सहभागिले सुझाव दिएका थिए । सरोकारवालाहरुको सुझावलाई आगामी नीति तथा कार्यक्रम र बजेटमा समावेश गरिने उपाध्यक्ष रेशम पुनमगरले बताउनुभयो ।
प्रमुख प्रसाशकीय अधिकृत धु्रब रिजालले सरोकारवालाहरुको रचनात्मक सल्लाह, सुझावले गाउँपालिकाको विकास निर्माण देखि सेवा प्रवाहमा सुधार ल्याउन सकिने बताउनुभयो । कार्यक्रमको सञ्चालन शिक्षा शाखाका प्राविधिक सहायक ख्यामराज सुवेदीले गर्नुभएको थियो ।
