शिखमा एकै दिन तीन वटा पुल र मेला उद्घाटन

गण्डकीपत्र डटकम
प्रकाशित मिती: २०८१ कार्तिक ६, मंगलवार १२:३२

म्याग्दीको अन्नपूर्ण गाउँपालिका-५ मा सोमबार एकै दिन तीन वटा मोटरेबल र झोलुङ्गे पुलको उद्घाटन भएको छ । अन्नपूर्ण गाउँपालिका-५ किन्दुमा रहेको सुनगाभा युवा क्लवले दसै र तिहार पर्वको अवसरमा आयोजना गरेको मेला र बास्केटबलको फाइबर बोर्डको पनि उद्घाटन भएको छ ।

पोखरेबगर–पाउद्धार सडक अन्तर्गगत अन्नपूर्ण गाउँपालिका–५ र ६ को सिमाना घारखोलामा निर्माण भएको मोटरेबल पुलको प्रतिनिधीसभाका पुर्व सांसद भुपेन्द्रबहादुर थापाले उद्घाटन गर्नुभएको हो ।

थापाले शिख देखि किन्दु जोड्ने झोलुङ्गे पुलको पनि उद्घाटन गर्नुभयो । घारखोलाको मोटरेबल पुर र शिख–किन्दु झोलुङ्गे पुल थापाको कार्यकालमा निर्माण शुरु भएका थिए । एक वर्षअघि निर्माण सकिएर प्रयोगमा आएको थियो ।

पोखरेबगर देखि नेपाने हुदै पाउद्धार जोड्ने सडक अन्तरगत घारखोलामा संघीय सरकारको रु. तीन करोड ४८ लाखको लागतमा २५ मिटर लामो मोटरेबल पुल निर्माण भएको हो ।

यसैगरी शिखको निरवाङ र किन्द जोड्ने तीन सय ४४ दशमलब आठ मिटर लामो झोलुङ्गे पुल पनि संघीय सरकारकै बजेटमा निर्माण भएको हो । एक वर्षअघि निर्माण सकिएको यो पुलले ४५ मिनेटको यात्राअवधिलाई २० मिनेटमा छोट्याएको छ ।

किन्दु, धोस्केखोरका बासिन्दालाई माध्यमिक विद्यालय र वडा कार्यालय रहेको शिख पुग्न सजिलो भएको छ । शिख, घिरवाङ र पाउद्धारका बासिन्दा पनि लाभान्वित भएका किन्दुका बासिन्दा रहेका शिख माविका शिक्षक खेम पुनले बताउनुभयो ।

आर्थिक वर्ष २०७८÷०७९ मा अन्नपूर्ण गाउँपालिका मार्फत स्वाँतको खोपा खोलामा रु. ३० लाखको लागतमा निर्माण भएको ६० मिटर लामो झोलुङ्गे पुलको जिल्ला समन्वय समितिका प्रमुख राजकुमार थापा र गाउँपालिकाका उपाध्यक्ष दिवा तिलिजा पुनले उद्घाटन गर्नुभयो ।

यसैगरी सुनगाभा युवा क्लवको बास्केटबल खेलमैदानमा निर्माण भएको फाइबर बोर्डको अन्नपूर्ण गाउँपालिकाका अध्यक्ष भारतकुमार पुनले उद्घाटन गर्नुभयो । नेकपा एमालेका नेता हरिकृष्ण श्रेष्ठ, खड्ग गिरि लगायतको उपस्थिति रहेको सो कार्यक्रममा स्थानीय कलाकारहरुले गित र नृत्य प्रस्तुत गरेका थिए । स्थानीयबासीहरुले गाउँको समस्याका विषयमा जनप्रतिनिधी र नेताहरुको ध्यानाकर्षण गराएका थिए ।