मुटुरोगसम्बन्धी शिविरबाट ११ सय बढीको चेकजाँच, १३ बिरामीको पहिचान

गण्डकीपत्र डटकम
प्रकाशित मिती: २०८१ चैत्र २०, बुधबार १६:२६

म्याग्दीको सदरमुकाम बेनीमा सञ्चालित दुई दिने निःशुल्क मुटु परीक्षण तथा उपचार शिविरबाट ११ सयभन्दा बढी बिरामी लाभान्वित भएका छन् । जिल्ला समन्वय समिति म्याग्दीसहित जिल्लाका ६ वटै स्थानीय तहको संयुक्त आयोजना र शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोगमा बुधबार सम्पन्न भएको शिविरमा मुटुसम्बन्धी परीक्षण, मधुमेह, उच्च रक्तचापलगायतका ११ सय १५ जनालाई सेवा प्रदान गरिएको हो ।

म्याग्दी बहुमुखी क्याम्पसमा सञ्चालन भएको शिविरको पहिलो दिन मंगलबार ५ सय ६५ जना, दोस्रो दिन ५ सय ५० जनाको चेकजाँच गरिएकोमा १३ बिरामीमा मुटुको समस्या देखिएको शिविर तथा तालिम ब्यवस्थापन समितिका संयोजक एवम् जिल्ला समन्वय समितिका शाखा अधिकृत अमृत सुबेदीले बताए ।

मुटुमा समस्या देखिएकालाई थप उपचारका लागि शहीद गङ्गालाल राष्ट्रिय हृदय रोग केन्द्रमा पठाउने र उपचारमा समेत सहुलियत प्रदान गरिने जिल्ला समन्वय समितिकी निमित्त प्रमुख दिलकुमारी खत्रीले बताइन् । ‘मुटुसम्बन्धी विशेषज्ञ सेवा लिन राजधानी तथा सुविधासम्पन्न अस्पताल जानुपर्ने अवस्थामा मुटुसम्बन्धी समस्या भएकालाई सेवा दिने हेतुले शिविर सञ्चालन गरिएको हो’ निमित्त प्रमुख खत्रीले भनिन् ।

शिविरमा म्याग्दीसहित छिमेकी जिल्ला पर्वत, बागलुङ र मुस्ताङबाट सेवा लिन बिरामी आएका थिए । मुटुरोग विशेषज्ञबाट मुटुको परीक्षण तथा परार्मश, सुगर, इसिजी, ईको तथा रक्तपरीक्षण गरिएको थियो । उच्च रक्तचापका बिरामी पनि म्याग्दीमा उल्लेख्य भेटिएको थियो । शहीद गङ्गालाल राष्ट्रिय हृदय रोग केन्द्र काठमाडौँका निर्देशक डा. रबी मल्लले शिविरमा ९ जना जन्मजात मुटुरोगको समस्या भेटिएको बताउँदै मुटुमा समस्या देखिएमा तुरुन्तै उपचारका लागि समेत अनुरोध गरे ।

‘लुकेर रहेका बिरामीको पहिचान गरी सम्पर्क गर्नुहोला,समस्या देखिएकाहरुलाई तुरुन्तै उपचार गछौं’ डा. मल्लले भने । शिविरमा म्याग्दी उद्योग वाणिज्य सङ्घ, राखु कल्याणकारी समाज, म्याग्दी जेसीज, नेपाल रेडक्रस सोसाईटी, ओमकुमारी शान्ति कोष र म्याग्दी बहुमुखी क्याम्पस स्वतन्त्र विद्यार्थी यूनियनले स्वंयमसेवक परिचालन गरेका छन् बेनी नगरपालिकाको नगर प्रहरी सहितको अन्य थप जनशक्ती समेत खटिएको जिल्ला समन्वय समितिले जनाएको छ ।

यसैबीच फोक्सो वा मुटुको गति रोकिएर मृत्युवरण हुने समस्यालाई रोक्न म्याग्दीको सदरमुकाम बेनीमा कार्डिओ–पल्मोनरी रिससिटेसन (सिपिआर) तालिम म्याग्दीका स्वास्थ्यकर्मी सहित कुल १ सय ५२ जनालाई प्रदान गरिएको छ । प्रदेश जनस्वास्थ्य कार्यालयमा आयोजित तालिममा १ सय ३५ जना स्वास्थ्यकर्मीको उपस्थिती रहेको थियो भने अन्य १७ जनाले तालिम लिएका थिए । तालिमको सहजीकरण स्वास्थ्यकर्मी प्रतिवेदन डंगोल सहित ६ जना स्वास्थ्यकर्मीले गरेका थिए ।

तालिममा मुटु वा फोक्सो बन्द भएर हुने त्यही मृत्युलाई रोक्न आवश्यक विधि सहित सिपिआरको आधारभूत ज्ञान प्रदान गरिएको थियो । तालिममा शहीद गङ्गालाल राष्ट्रिय हृदय रोग केन्द्रका चिकित्सक सहितको स्वास्थ्यकर्मीको टोलीले आधारभूत सैद्धान्तिक, प्रयोगात्मक अभ्यास सहितको करिब ५ घण्टा सहजीकरण गरिएको थियो । तालिमका सहभागिले निकै उपयोगी भएकाले आफ्नो क्षेत्रमा पनि सञ्चालन गर्ने प्रतिबद्धता जनाएका थिए ।