म्याग्दीको बेनी नगरपालिका–६ मा रहेको अर्थुङ्गे युवा क्लबले आयोजना गरेको सातौँ अर्थुङ्गे कप एवं फाइभ ए साइड फुटसल प्रतियोगिताको उपाधि आयोजक अर्थुङ्गे युनाइटेडले जितेको छ । बेनी नगरपालिका–८, शिक्षामार्गस्थित बेनी फुटसल खेलमैदानमा सम्पन्न फाइनल खेलमा थाकली ग्रुपलाई १ का विरुद्ध ४ गोलले पराजित गर्दै अर्थुङ्गे युनाइटेडले उपाधि आफ्नो पोल्टामा पारेको हो ।
Advertisement
उपाधिसँगै अर्थुङ्गे युनाइटेडले नगद एक लाख ११ हजार १११ रुपैयाँसहित ट्रफी, मेडल र प्रमाणपत्र प्राप्त गरेको छ । उपविजेता बनेको थाकली ग्रुपले नगद ५५ हजार ५५५ रुपैयाँसहित ट्रफी, मेडल र प्रमाणपत्रमा चित्त बुझाएको छ । प्रतियोगितामा व्यक्तिगत तथा टिमगत विधातर्फ पनि उत्कृष्ट खेलाडी र टोलीलाई पुरस्कृत गरिएको छ ।
Advertisement
प्रतियोगिताको उत्कृष्ट खेलाडी (बेस्ट प्लेयर) आशिष गुरुङ घोषित भए भने अनुशासित टोलीको उपाधि धुपीबोट ग्रुप अफ क्लबले प्राप्त गरेको छ । त्यस्तै, उत्कृष्ट गोलरक्षक (बेस्ट गोलकिपर) को उपाधि आयोजक अर्थुङ्गे युवा क्लबका गोलरक्षकले हात पारेका छन्। क्लबका अध्यक्ष विवेक बानियाँका अनुसार अनुशासित टोलीलाई नगद सात हजार रुपैयाँ र उत्कृष्ट गोलरक्षकलाई नगद पाँच हजार रुपैयाँ पुरस्कार प्रदान गरिएको छ ।
स्थानीय स्तरमा फुटसल खेलको विकास, खेलाडीको प्रतिभा पहिचान तथा खेलकुदको प्रवद्र्धन गर्ने उद्देश्यले प्रतियोगिता आयोजना गरिएको प्रतियोगितामा १७ टिमको सहभागिता रहेको थियो ।
