डोटीमा निर्वाचन सामाग्री बोकेको जीप दुर्घटना, मतदान अधिकृत घाइते

शिखर समाचार
प्रकाशित मिती: २०७९ मंसिर १, बिहीबार १५:३२

दिपायल- डोटीमा निर्वाचन सामाग्री बोकेको जीप दुर्घटना भएको छ । जिल्लाको बडीकेदार गाउँपालिका– ५ अत्तरकाँडामा बा २ झ २२३५ नम्बरको जीप दुर्घटना भएको हो ।

बिहीबार भएको उक्त दुर्घटनामा मतदान अधिकृत दिनेश रैखोला सामान्य घाइते भएको जिल्ला प्रहरी कार्यालय डोटी प्रमुख प्रहरी उपरीक्षक राजेन्द्रप्रसाद धमालाले जानकारी दिए । बडीकेदार गाउँपालिका– ५ मार्काेटमा रहेको मतदान केन्द्रका लागि निर्वाचन सामाग्री र कर्मचारी बोकेर सिलगढीबाट हिंडेको जीप दुर्घटना भएको हो ।

जीपको ब्रेकफेल भएपछि दुर्घटना भएको बताइएको छ । जीपमा कर्मचारी, सुरक्षाकर्मी लगायत ११ जनाको टोली सवार रहेको थियो । जीपमा रहेको सामग्री र कर्मचारी अर्को गाडीको व्यवस्था गरेर पठाईएको प्रहरीले जनाएको छ ।