डोटीका ६ जना उम्मेदवारको जमानत जफत

शिखर समाचार
प्रकाशित मिती: २०७९ मंसिर १२, सोमबार १०:३६

दिपायल – मंसिर ४ गते सम्पन्न प्रतिनिधिसभा र प्रदेशसभा निर्वाचनमा सहभागी ६ जना उम्मेदवारहरुको जमानत (धरौटी) जफत हुने भएको छ । एउटा प्रतिनिधि सभा र दुई वटा प्रदेश सभा निर्वाचन क्षेत्र रहेको डोटीमा १३ जनाको उम्मेदवारी परेको थियो । जसमध्य ६ जनाको जमानत जफत हुने भएको छ ।

निर्वाचनमा भएको मतदानमा खसेको कुल सदर मतको १० प्रतिशत नपुग्ने उम्मेदवारको जमानत जफत हुने व्यवस्था रहेको जिल्ला निर्वाचन कार्यालयका निर्वाचन अधिकारी करुणकर पन्तले जानकारी दिनु भयो । जफत भएको जमानत र जमानत फिर्ता लिन उम्मेदवार नआए सो रकम समेत नेपाल सरकारको राजस्वमा जम्मा हुने उहाँले बताउनु भयो ।

मुख्य निर्वाचन अधिकृतको कार्यालयले दिएको तथ्याङ्क अनुसार प्रतिनिधि सभाका ३ जना र प्रदेश सभाका ३ जना गरी ६ जनाको जमानत जफत हुने छ । ५ जना दलहरुका उम्मेदवार र एक जना स्वतन्त्र उम्मेदवारको जमानत जफत हुने भएको हो ।

प्रतिनिधिसभाको प्रत्यक्षतर्फ ६३ हजार ५५२ मत खसेकोमा ५४ हजार ९३२ मत सदर भएको थियो । यो क्षेत्रमा जमानत सुरक्षित गर्न ५ हजार ५९४ मत ल्याउनुपथ्र्यो । ६ जना उम्मेदवार रहेको प्रतिनिधिसभामा ३ जनाले जमानत सुरक्षित गर्न सकेनन् । राष्ट्रिय प्रजातन्त्र पार्टीका उम्मेदवार अंकबहादुर खड्का, राष्ट्रिय स्वतन्त्र पार्टीका उम्मेदवार केशव बलायर र स्वतन्त्र उम्मेदवार राज प्रसाद जोशीको जमानत जफत हुने भएको हो । खड्काले ८०२, बलायर ले ७७४ र जोशीले १०४ मत मात्रै प्राप्त गर्नु भएको थियो ।

प्रदेशसभा “क” मा प्रत्यक्षतर्फ ४ जनाको उम्मेदवारी रहेकोमा २ जनाले जमानत सुरक्षित गर्न सक्नु भएन । यो क्षेत्रमा ३३ हजार ३२२ मत खसेकोमा ३१ हजार ३३१ मत सदर भएको थियो । यहाँ जमानत सुरक्षित गर्न कम्तीमा ३ हजार १३४ मत आवश्यक थियो । प्रदेश सभा सदस्यका उम्मेदवार हाम्रो नेपाली पार्टीका शैलेन्द्र खड्का र राष्ट्रिय स्वतन्त्र पार्टीका नेत्र नाथको जमानत जफत हुने भएको छ । खड्काले ५४० र नाथले ७५५ मत मात्रै प्राप्त गर्नु भएको थियो ।

त्यस्तै प्रदेशसभा “ख” मा प्रत्यक्षतर्फ ३ जनाको उम्मेदवारी परेको थियो । जसमध्य राष्ट्रिय स्वतन्त्र पार्टीका उम्मेदवार मोहन बहादुर बमको जमानत जफत हुने भएको छ । यस क्षेत्रमा ३० हजार २३४ मत खसेकोमा २८ हजार ५०२ मत सदर भएको थियो । जमानत सुरक्षित गर्नका लागि २ हजार ८५१ मत आवश्यक पर्छ । उम्मेदवार बमले एक हजार ३२७ मत मात्रै प्राप्त गर्नुभएको थियो ।

यहाँ प्रतिनिधि सभा सदस्यमा नेकपा (एकीकृत समाजवादी) का उम्मेदवार प्रेम बहादुर आलेमगर विजयी हुनुभएको छ । प्रदेश सभा सदस्यमा प्रतिनिधि सभा (क) बाट नेकपा एमालेका उम्मेदवार चक्र मल्ल र प्रदेश सभा (ख) बाट नेकपा –माओवादी केन्द्र) का उम्मेदवार शिवसिंह ओली विजयी हुनुभएको छ ।