म्याग्दीको बेनी नगरपालिका–९ मा रहेको गलेश्वर ठूलो सल्लेरी सामुदायिक वन उपभोक्ता समितिले वनबाट भएको आम्दानी विभिन्न सामाजिक क्षेत्रमा लगानी गरेको छ ।
Advertisement
समितिको काउलेगौँडामा भएको २४ औँ साधारणसभा तथा नवौ अधिवेशनको अबसरमा सार्वजनिक गरिएको आर्थिक प्रतिवेदनमा विभिन्न शिर्षकमा वन उपभोक्ताको अधिनमा रहेर काम गरेको समितिले जनाएको छ ।
आर्थिक प्रतिवेदन अनुसार भवन निर्माण, पोखरी निर्माण, बाटो तथा पहिरो नियन्त्रण लगायतका काम गरेको छ । खर घाँस, काठ, हल भाडा आम्दानी लगायतबाट भएको आम्दानीलाई शिक्षा क्षेत्रमा समेत लगानी गरेको वन उपभोक्ता समितिका अध्यक्ष पुण्य चोखालले जानकारी दिनुभयो ।
Advertisement
साधारणसभामा प्रस्तुत भएको लेखा परिक्षण प्रतिवेदन अनुसार अर्थिक बर्ष २०७८÷७९ मा करिब एक करोड बराबरको कारोबार भएको छ । केही रकमलाई घुम्ती कोष मार्फत लगानी गरिएको छ ।
कार्यक्रममा बोल्दै डिभिजन बन कार्यालय म्याग्दीका प्रमुख मनोज रानाभाटले समुदायीक बनको आम्दानीले सामाजिक काम गर्नु राम्रो भएको बताउनुभयो । उहाँले बन संरक्षणमा सबै एक भएर लाग्नुपर्नेमा जोड दिनुभयो ।
त्यस्तै वडा अध्यक्ष चक्र केसीले वडामा क्षेत्रमा पर्ने सामुदायिक बनहरुको संरक्षण र प्रवद्धनमा वडाले सक्दो सहयोग गर्ने बताउनुभयो । कार्यक्रममा पूर्व अध्यक्ष टेकबहादुर बानियाँ र सचिव राम्जी शर्मालाई सम्मान गरिएको थियो । कार्यक्रममा पूर्व अध्यक्ष त्रिबिक्रम सुबेदी, निर्वतमान वडा अध्यक्ष बेल बहादुर चोखाल, बृद्धि बहादुर चोखालले बोलेका थिए ।
छ सय एक जना उपभोक्ता रहेको समितिको नयाँ कार्य समिति चयन भने भएको छैन । हाललाई पुरानै कार्य समिति कायम रहने र केही समयमा उपभोक्ताहरुको बेला बोलाएर नयाँ कार्यसमिति चयन गर्ने निर्णय भएको शर्माले जानकारी दिनुभयो ।
कार्यक्रममा अध्यक्ष पुण्य चोखालको अध्यक्षता उपाध्यक्ष शान्ती रोकाको स्वागत र राम्जी शर्माको सञ्चालनमा सम्पन्न भएको थियो ।
