Advertisement
- Beni-8 Myagdi Beni Bazar, Myagdi
- gandakipatra78@gmail.com
२०७९ चैत्र १५
March 29, 2023, Wednesday
म्याग्दीको मालिका गाउँपालिका–६, दरबाङ बजारमा शुद्ध खानेपानी ल्याउने आयोजना सुरु भएको छ वर्षमा पनि सम्पन्न हुन सकेको छैन । वि.सं. २०७४ फागुनदेखि थालिएको दरबाङ खानेपानी आयोजनाको अहिलेसम्म ५० प्रतिशत काम सकिएको छ ।
सङ्घीय सरकारको क्रमागत बजेटअन्तर्गत २०७८ मै आयोजना सम्पन्न हुनुपर्ने थियो । सङ्घीय सरकारको दुई करोड ९९ लाख ४० हजार ९३६ रुपियाँ र स्थानीयवासीको २० प्रतिशत श्रमदानमा दरबाङ खानेपानी तथा सरसफाइ आयोजना उपभोक्ता समितिमार्फत निर्माणाधीन उक्त आयोजनाको आर्थिक वर्ष २०७२÷७३ मा सर्वेक्षण गरेपछि २०७४ फागुन महिनादेखि काम थालिएको थियो ।
खानेपानी आयोजना निर्माणमा ढिलाइ हुँदा स्थानीवासीले सास्ती बेहोर्नु परेको दरबाङका रघुनाथ न्यौपानेले बताउनुभयो । दरबाङमा जनसङ्ख्या बढ्दै गएकाले समयमै आयोजना निर्माण सम्पन्न गर्नुपर्नेमा जोड दिनुभयो । सङ्घीयता स्थापनासँगै खानेपानी कार्यालयको संरचना परिवर्तन, विश्वव्यापी रूपमा फैलिएको कोरोना महामारी, २०७७ मा आयोजना निर्माण क्षेत्रको जङ्गलमा आगलागी हुँदा र बर्सातको समयमा दरबाङ–दिच्याम सडकबाट खसेको पहिरोले पाइप बगाउँदा निर्माणमा ढिलाइ भएको उपभोक्ता समितिका अध्यक्ष ओमप्रकाश शेरचनले बताउनुभयो ।
उहाँका अनुसार उक्त आगलागीमा ९० एमएमको तीन सय मिटर, ६३ एमएमको एक हजार मिटर ५० एमएमको ९५० मिटर पाइप जलेर नष्ट भएको थियो । चालू आर्थिक वर्षमा सम्पन्न गर्ने लक्ष्य राखेर आयोजना निर्माणलाई तीव्रता दिइएको उहाँले बताउनुभयो । उहाँले भन्नुभयो, “विविध कारण केही समय आयोजना निर्माणको काम रोकिएको हो । सुचारु भएको आयोजना निर्माणलाई यो आर्थिक वर्षभित्र सम्पन्न गर्ने गरी तीव्रता दिएका छौँ ।”
योजनाअन्तर्गत गाउँपालिका–७ स्थित छिपछिपे, ढुनोट र वडा नम्बर ६ गोजाखोला मुख्य मुहान र तेलचाप्रे, धाढखर्कमाथिको सहायक मुहानबाट पानी ल्याएर दरबाङलाई वितरण गरिनेछ ।
उक्त खानेपानी आयोजनाबाट प्रतिदिन ९९ हजार ३८५ लिटर पानी आपूर्ति हुनेछ । आयोजनाबाट २९६ घरधुरीका १५४१ जनसङ्ख्या लाभान्वित हुनेछन् । अहिलेसम्म सबै मुहानमा ट्याङ्की, सङ्कलन र रिजर्भ ट्याङ्की निर्माण भएका छन् । मुहानबाट ६.८० किलोमिटर मुख्य पाइपलाइन बिछ्याउने काम अन्तिम चरणमा पुगेको छ । भने ३.६८ किलोमिटर शाखा लाइनको पाइप बिछ्याउने र धारामा मिटर जडानको काम बाँकी रहेको छ ।
खानेपानी, जलस्रोत तथा सिँचाइ विकास डिभिजन कार्यालय म्याग्दीका इन्जिनियर राजेश उलकका अनुसार, कार्यालयले आयोजना निर्माणका लागि पाइपसहित आवश्यक सामग्री खरिद गरी आयोजना निर्माण स्थलसम्म ढुवानीसमेत
गरिसकेको छ ।
FacebookTweetLikeShareLinkedInEmail शिक्षा विकास तथा समन्वय इकाई म्याग्दीले माध्यमिक शिक्षा परीक्षा (एसइई) संचालनमा नियुक्त गरिएका केन्द्राध्यक्षलाई अभिमुखीकरण गरेको छ । Advertisement...
FacebookTweetLikeShareLinkedInEmail दाल, तरकारी र मासुका परिकार स्वादिष्ट र सुगन्धित बनाउने मसला जातको धनियाँको मुठा (साग) बेचेर म्याग्दीका एक व्यक्तिले वार्षिक...
FacebookTweetLikeShareLinkedInEmail पश्चिम म्याग्दीको दरवाङ प्राथमिक स्वास्थ्य केन्द्रमा दुई महिनादेखि ‘एक्सरे मेसिन’ प्रयोगविहीन भएपछि बिरामीलाई सास्ती भएको छ। Advertisement थ्री फेज...
