पर्यटन दिवसमा पत्रकार र पर्यटन अभियन्ता सम्मानित

गण्डकीपत्र डटकम
प्रकाशित मिती: २०८१ आश्विन ११, शुक्रबार १५:०९

जिल्लाको पर्यटन क्षेत्रमा योगदान पुर्‍याउने पर्यटन अभियन्ता र पत्रकारलाई सम्मान गरिएको छ । ४५ औं विश्व पर्यटन दिवसका अवसरमा पर्यटन तथा उद्योग कार्यालय म्याग्दीले शुक्रबार बेनीमा आयोजना गरेको कार्यक्रममा पर्यटन अभियन्ता तथा व्यावसायी तेजबहादुर गुरुङ र पर्यटकीय स्थलहरुको प्रचारप्रसारमा योगदान पुर्‍याएकाे भन्दै पत्रकार घनश्याम खड्का र सन्तोष गौतमलाई सम्मान गरिएको हो ।

गण्डकी प्रदेश सभा सदस्य विमला गौचन, जिल्ला समन्वय समिति म्याग्दीका प्रमुख राजकुमार थापा र पर्यटन तथा उद्योग कार्यालय म्याग्दीका प्रमुख पोषनाथ शर्माले उहाँहरूलाई दोसल्ला र प्रमाणपत्रले सम्मान गर्नुभएको हो ।

अन्नपूर्ण गाउँपालिका ४ नारच्याङ निवासी गुरुङ समुद्री सतहदेखि ८०९१ मिटर अग्लो अन्नपूर्ण प्रथम हिमालको उत्तरी आधार शिविरमा पर्यटकीय सम्भावनाको खोजी र प्रवर्धनमा विगत एक दशक अघिदेखि निरन्तर रुपमा क्रियाशील हुनुहुन्छ ।

मौरिस हर्जोग पदमार्गको पहिचान,पूर्वाधार निर्माण र यस क्षेत्रको पर्यटन प्रवर्धनमा महत्वपूर्ण योगदान पुर्‍याएकाले उहाँलाई सम्मान गरिएको पर्यटन तथा उद्योग कार्यालय म्याग्दीका प्रमुख शर्माले बताउनुभयो । साथै जिल्लाको पर्यटन क्षेत्रलाई पत्रकारिताको माध्यमबाट प्रचारप्रसारमा टेवा पुर्‍याउनुहुने सञ्चारकर्मीलाई पनि सम्मान गरिएको उहाँले जानकारी दिनुभयो ।

सम्मान कार्यक्रममा गण्डकी प्रदेश सभा सदस्य विमला गौचनले जिल्लामा भएका पर्यटकीय स्थलहरुको प्रचारप्रसार र भौतिक पूर्वाधार निर्माण गरेमा पर्यटक भित्र्याउन सकिने विचार व्यक्त गर्नुभयो । सङ्घीयतापछि स्थानीय तह, प्रदेश र सङ्घीय सरकारले पर्यटन क्षेत्रको विकासका लागि प्राथमिकतामा राखेर पूर्वाधार निर्माण र प्रवर्धनमूलक कार्यक्रमहरु अघि सारेको उहाँको भनाइ थियो ।

कार्यक्रममा बेनी नगरपालिकाका उपप्रमुख ज्योति लामिछाने, बेनी नगरपालिका वडा नम्बर ८ का वडाध्यक्ष उत्तमकुमार कर्माचार्य, म्याग्दी उद्योग वाणिज्य सङ्घका वरिष्ठ उपाध्यक्ष राजेश शाक्य र पर्यटन अभियन्ता अमर बानियाँले जिल्लाको पर्यटन क्षेत्रको सम्भावना,चुनौती र समस्याका बारेमा विचार व्यक्त गर्नुभएको थियो ।