म्याग्दीको मालिका गाउँपालिका–१ खहरेमा रहेको सिद्ध आधारभूत विद्यालयमा निर्माण भएको कक्षा कोठा भवनहरुको आइतबार उद्घाटन गरिएको छ ।
Advertisement
विभिन्न निकायको अनुदान सहयोग र समुदायको श्रमदान गरि कुल रु. एक करोड ७७ हजार पाँच सय ३४ को लागतमा निर्माण भएका तीन वटा भवनमा आठ वटा कोठा रहेका प्रअ मोतिराज गौतमले जानकारी दिनुभयो ।
Advertisement
संविधानसभा सदस्य नवराज शर्मा, गण्डकी प्रदेशका पुर्व मन्त्री नरदेवी पुन र जिल्ला समन्वय समिति म्याग्दीका प्रमुख राजकुमार थापाले भवनको उद्घाटन गर्नुभएको हो । सो कार्यक्रममा मालिका गाउँपालिकाका अध्यक्ष बेगप्रसाद गर्बुजा र पुर्व उपाध्यक्ष खरमाया बिटालु पनि सहभागि हुनुभएको थियो ।
तत्कालीन राष्ट्रिय पुनःनिर्माण प्राधिकरणको अनुदान र श्रमदान गरि कुल ८१ लाख ३७ हजार छ सय ९९ को लागतमा दुई तले चार कोठे भवन निर्माण भएको थियो । संविधानसभा सदस्य शर्मा र संघीय सरकारका पुर्व पशुपंक्षी राज्यमन्त्री तथा प्रदेश सरकारका पुर्व सामाजिक विकास मन्त्री नरदेवी पुनको सिफारिसमा निर्वाचन क्षेत्र पूर्वाधार विकास कार्यक्रमको अनुदान सहयोगमा दुई÷दुई कोठे एक तले भवन निर्माण भएको हो ।
भवन उद्घाटन समारोहमा विद्यालयका संस्थापक गंगबहादुर पुन, देवीप्रसाद आचार्य, दलमान पुन, पुरुषोत्तम शर्मा र पतिराम सिउथानीको नाम उल्लेखित शिलालेखको पनि अनावरण गरिएको थियो । संस्थापक आचार्यलाई सम्मान समेत गरिएको छ ।
कक्षा आठ सम्मको पठनपाठन हुने विद्यालयमा हाल एक सय ५० जना विद्यार्थी अध्ययनरत छन् । वि.स. २०३९ मा विद्यालय स्थापना भएको थियो । यसअघिको भवन जिर्ण बनेकाले नयाँ निर्माण गरिएको हो । पुस्तकालय र चमेना गृहका लागि थप दुई कोठा आवश्यक रहेका विद्यालय व्यवस्थापन समितिका अध्यक्ष मानसिङ सापकोटाले बताउनुभयो ।
गाउँपालिका, प्रदेश र संघीय सरकारका निकायमा भवन निर्माणका लागि पहल गरिदिन उहाँले आग्रह गर्नुभयो । कार्यक्रममा संविधानसभा सदस्य शर्मा र पुर्वमन्त्री पुनले सामुदायिक विद्यालयको गुणस्तर सुधार गर्न सकेमा बसाईसराई कम गर्न सकिने बिचार व्यक्त गर्नुभयो ।
मालिका गाउँपालिकाका अध्यक्ष गर्बुजाले विद्यालयहरुमा पूर्वाधार निर्माणसँगै सिकाई उपलब्धी सुधार, शिक्षालाई प्रविधीमा जोड्ने प्रयास गरेको बताउनुभयो । कार्यक्रममा विद्यार्थी र आमा समूहको तर्फबाट नृत्य प्रस्तुत गरिएको थियो ।
