जलजलाकाे तेस्रो राष्ट्रपति रनिङ शिल्डमा विद्याज्योती मावि मल्लाज प्रथम

गण्डकीपत्र डटकम
प्रकाशित मिती: २०८१ मंसिर १५, शनिबार १५:३१

पर्वतको जलजला गाउँपालिकामा तेस्रो राष्ट्रपति रनिङ शिल्ड खेलकुद प्रतियोगितामा विद्याज्योती मावि मल्लाज प्रथम भएको छ । शनिबार सम्पन्न भएको गाउँपालिकाभित्रका अन्तर विद्यालय स्तरीय प्रतियोगितामा विद्याज्योतिले १४ स्वर्ण, ९ रजत र २ काँस्य पदक हात पारेको थियो भने न्यु होराइजन आवसीय माविले ६ स्वर्ण, ७ रजत र ५ काँस्य पदक जितेको छ ।

तेस्रो अमृत प्याराडाइज एकेडमी मल्लाजले ३ स्वर्ण, १ रजत र ४ काँस्य पदक जितेको छ । प्रतियोगितामा बिजेतालाई गाउँपालिका उपाध्यक्ष दिपक आचार्य, वडा अध्यक्ष हरिविकास जिसी सहित स्थानीय जनप्रतिनिधिले नगद ५० हजारको साथमा रनिङ शिल्ड, ट्रफि, मेडल र प्रमाणपत्रद्धारा पुरस्कृत गरिएको थियो ।

द्धितिय र तृतिय हुने विद्यालयलाई क्रमश : नगद रु ३० हजार र २० हजारको साथमा ट्रफि, मेडल र प्रमाणपत्रद्धारा पुरस्कृत गरिएको थियो । तीन दिनसम्म सञ्चालन भएको प्रतियोगितामा गाउँपालिकाभित्रका विभिन्न १४ विद्यालयले सहभागीता जनाएका थिए । प्रतियोगितामा छात्र÷छात्राको भलिबल, कबड्डी र एथलेटिक्स विद्यामा प्रतिस्पर्धा भएको थियो ।

प्रतियोगिताको समापनमा गाउँपालिका विद्यार्थीहरुमा रहेको खेल प्रतिभाको पहिचानसँगै आगामी दिनमा थप प्रोत्साहनका कार्यक्रमहरुलाई समेत प्राथमिकता दिने गाउँपालिका उपाध्यक्ष आचार्यको भनाई थियो । समापन कार्यक्रमको अध्यक्षता शिक्षा अधिकृत यज्ञप्रसाद लामिछाने र सञ्चालन प्राविधिक सहायक देवी रिजालले गर्नुभएको थियो ।