२२ औं अन्तरमावि म्याग्दी जेसीज कप फुटबल प्रतियोगितामा माउण्ट एभरेष्ट आवासीय मावि च्याम्पियन बनेको छ । शनिबार सदरमुकाम खुल्लामञ्चमा सम्पन्न भएको खेलमा निर्धारित समयमा १–१ बराबरीपछि पेनाल्टी सुटआउटमा पेनाल्टीमा बेनी सामुदायिक माविलाई माउण्ट एभरेष्टले ५–४ ले पराजित गदैं उपाधी जितेको हो ।
Advertisement
निकै प्रतिस्पर्धात्मक खेलमा निर्धारित समयमा १–१ गोलसँगै पेनाल्टी शुटआउटको अन्तिम प्रहारमा बेनी सामुदायिका खेलाडी चुक्दा जेसीज कपको इतिहासमै पहिलोपटक बिजेता बन्ने सपना अधुरै रर्यों भने ६ संस्करण पछि माउण्ट एभरेष्टले उपाधीको स्वाद लिएको छ । यस अघि सन २०१६ मा १५ औं संस्करणको उपाधि जितेको माउण्टलाई पुनः उपाधि जित्नका लागि २२ औं संस्करण सम्म कुर्नु परेको थियो ।
Advertisement
प्रतियोगिताका विजेता माउण्ट एभरेष्टले जनप्रिय मावि दरबाङ र उपविजेता बेनी सामुदायिक माविले डिफेन्डिङ च्याम्पियन न्यु वेष्ट पोइन्ट आवासीय माविलाई हराउँदै फाइनलमा प्रवेश गरेका थिए ।
प्रतियोगितामा बिजेता विद्यालयलाई गण्डकी प्रदेशसभाका सदस्य हरि भण्डारीले रनिङ शिल्ड, ट्रफि, मेडल र प्रमाणपत्र सहित नगद ५२ हजार २२२ र उपबिजेतालाई ट्रफि, मेडल र प्रमाणपत्रको साथमा नगद रु ३२ हजार २३२ पुरस्कार प्रदान गरेका थिए ।
पुरस्कार वितरणमा बेनी नगरपालिकका प्रबक्ता रमेशकुमार श्रेष्ठ, जिल्ला खेलकुद विकास समितिका अध्यक्ष दिनेश केसी, म्याग्दी उद्योग वाणिज्य संघका अध्यक्ष सुविन श्रेष्ठ, म्याग्दी जेसीसका अध्यक्ष दिनेश बानियाँ लगायतको उपस्थिती रहेको थियो ।
प्रतियोगितामा सर्वाधिक गोलकर्ता ११ गोल सहित सुनिल थापा,उत्कृष्ट गोलरक्षक बेनी सामुदायिकका सन्दिप खत्री, उत्कृष्ट डिफेन्डर माउण्ट एभरेष्टका मनोज मल्ल रहेका छन् ।
त्यस्तै उत्कृष्ट स्ट्राईकर माउण्ट एभरेष्टका सनम बिक, उत्कृष्ट मिडफिल्डर न्यू वेष्ट प्वाइन्टका पवन खत्री, राईजिङ प्लेयर एन्जल थजाली माउण्ट एभरेष्ट तथा उत्कृष्ट प्रशिक्षक माउण्ट एभरेष्ट आवासिय माविका टिपेन पुन र अनुशासित टिम न्यू वेष्ट प्वाइन्ट आवासियलाई सम्मान गरिएको मुल संयोजक देबेन्द्र घिमिरेले बताए ।
बिजेता माउण्ट एभरेष्टका कप्तान सनम विक मैदानमा खेल सकिदाँ वित्तिकै आफ्ना बुबाको अन्तेष्टीका लागि गएका थिए । लामो समयसम्म बिरामी भएका बुबाको घरमै निधन भएपछि प्रतियोगिताका उत्कृष्ट स्ट्राईकर समेत रहेका विक कालिगण्डकी नदीमा जाँदा खेलाडी समेत भाबुक भएका थिए ।
अन्तरमावि जेसीज कप फुटबल प्रतियोगिताका लागि एभरेष्ट ग्लोबल एजुकेशन भिसा सर्भिसेस बेनीले सन् २०२८ सम्म मुख्य प्रायोजन गरेको छ । म्याग्दीमा फुटबल खेलाडीको उत्पादनका लागि म्याग्दी जेसीज कपलाई गेट किपरको रुपमा लिइन्छ ।
