मंगला शिक्षा क्याम्पसको स्ववियु सभापतिमा अनेरास्ववियुका पुन निर्विरोध

गण्डकीपत्र डटकम
प्रकाशित मिती: २०८१ फाल्गुन २७, मंगलवार १५:४०

म्याग्दीको मंगला गाउँपालिका(२,बाबियाचौर लाम्पाटामा रहेको मंगला शिक्षा क्याम्पसको स्ववियु निर्वाचनमा एमाले निकट अनेरास्ववियुका एल्डीस पुन सहित प्यानल निर्विरोध विजयी भएको छ ।

मंगला–१ कुहुँ थाइवाङ निवासी पुनसँगै सचिवमा विन्दा रोका काषाध्यक्ष मञ्जिना बुढाथोकी सदस्यहरु सचिना किसान, सलोन पुन र रामकुमारी थापा समेत निर्विरोध निर्वाचित भएको निर्वाचन समितिका संयोजक कमलबहादुर भण्डारीले जानकारी दिनुभयो ।

पश्चिम म्याग्दीको शैक्षिक धरोहरको रुपमा रहेको क्याम्पसको स्ववियू निर्वाचनका लागि चार विद्यार्थी संगठनले निर्वाचनका लागि संगठन दर्ता गरेपनि अनेरास्ववियुको प्यानल विरुद्ध कसैले पनि उम्मेदवारी भने दिएनन् । म्याग्दीको सदरमुकाम बाहिरको एक मात्रै क्याम्पस मंगलामा यसअघि सम्पन्न दुई स्ववियू निर्वाचन नेकपा एमाले निकट अनेरास्ववियुले निर्वाचन जित्दै आएको थियो ।

सर्वसम्मत भएकालाई कार्यतालिका अनुसार सपथ ग्रहण गरिने क्याम्पस प्रमुख पितमबहादुर खत्रीले बताउनुभयो । स्ववियु सभापति पुनले क्याम्पसलाई समुदायमा स्थापित गर्न र विद्यार्थीको हकहितका लागि निरन्तर सक्रिय हुने बताउनुभयो । यता म्याग्दी बहुमुखी क्याम्पसमा भने चार संगठनले उम्मेदवारी दर्ता गरेका छन् ।