अन्नपूर्ण हीरक महोत्सवको अवसरमा आयोजना गरिएको अन्नपूर्ण म्याराथन प्रतियोगितामा कुशल पुर्जा प्रथम हुनुभएको छ । अन्नपूर्ण गाउँपालिका ७ घराम्दीका २४ वर्षीय पुर्जाले दुई घण्टा ४७ मिनेट ३७ सेकेन्डमा करिब ३६ किलोमिटर दूरी पार गरेर अन्नपूर्ण म्याराथन दौड प्रतियोगिताको उपाधि हासिल गर्नुभएको हो ।
Advertisement
आठ हजार ९१ मिटर अग्लो अन्नपूर्ण प्रथम हिमालको आधार शिविरबाट बिहान ६ः३० बजे म्याराथन दौड प्रतियोगिता सुरु भएको थियो । यसैगरी, अन्नपूर्ण गाउँपालिका ६ घारका २४ वर्षका लोकबहादुर बरुवालले २ घण्टा ५२ मिनेट ५१ सेकेन्ड लगाएर द्तिीय र सोही वडाका सञ्जयबहादुर बरुवालले तीन घण्टा आठ मिनेट ३६ सेकेन्डमा दूरी पार गरेर तृतीय हुनुभयो ।
म्याग्दीको अन्नपूर्ण गाउँपालिका ४ नारच्याङस्थित आठ हजार ९१ मिटर अग्लो अन्नपूर्ण प्रथम हिमाल आरोहणको ७५ वर्ष पुगेको अवसरमा म्याराथन दौड प्रतियोगिताको आयोजना गरिएको म्याराथन दौड प्रतियोगिताका व्यवस्थापन संयोजक इन्द्रसिंह शेरचनले जानकारी दिनुभयो । उहाँका अनुसार आधार शिविरबाट सुरु भएको दौड भुस्केटमेला, गुफाफाँट, फुतफुते झरना, हुमखोला, छोटेपा, मालारानी, बाँस्कोट हुँदै नारच्याङको बेंसी गाउँसम्म आएर समापन गरिएको छ । प्रतियोगितामा ४० जना धावकहरुले सहभागी जनाएका थिए । अन्य धावकहरु भने आउने क्रममा रहेका छन् ।
नारच्याङको बेँसी गाउँदेखि सुरु हुने मौरिस हर्जोग पदमार्गलाई विश्वव्यापी रुपमा प्रचारप्रसार गर्ने उद्देश्यले म्याराथन दौड प्रतियोगिता आयोजना गरिएको पालिका अध्यक्ष भारतकुमार पुनले बताउनुभयो ।
म्याराथन दौड प्रतियोगितामा जिल्ला भित्रका स्थानीय तहबाट मात्र सहभागी थिए । अन्नपूर्ण गाउँपालिका भित्र रहेका प्रत्येक वडाबाट पाँच/पाँच जना र अन्य स्थानीय तहबाट दुई/दुईजनाका दरले सहभागी भएका छन् ।
प्रतियोगितामा प्रथम हुनेलाई ५० हजार, द्वितीय ३० हजार र तृतीयलाई २० हजार रुपियाँ नगद पुरस्कार र प्रमाणपत्र प्रदान गरिने म्याराथन प्रतियोगिता व्यवस्थापन संयोजक शेरचनले जानकारी दिनुभयो । नारच्याङमा आयोजना गरिएको अन्नपूर्ण हीरक महोत्सवको मुल कार्यक्रमा विजेताहरुलाई प्रधानमन्त्री केपी शर्मा ओलीले पुरस्कार र प्रमाणपत्र प्रदान गर्नुहुने छ ।
यही जेठ १६–२२ सम्म विभिन्न कार्यक्रमका साथमा अन्नपूर्ण हीरक महोत्सवको आयोजना गरिएको छ । कार्यक्रममा आज प्रधानमन्त्री केपी शर्मा ओली आउदै हुनुहुन्छ ।
अन्नपूर्ण गाउँपालिकाको नेतृत्वमा पर्यटन बोर्ड, पर्वतारोहण संघ, एक्याप र स्थानीय पर्यटन व्यवस्थापन समितिको अगुवाईमा अन्नपूर्ण हीरक महोत्सव आयोजना गरिएको छ ।
