पाखापानी क्षेत्रका दुर्गम र ग्रामीण गाउँ बस्तीमा इन्टरनेटको पहुँच विस्तार

गण्डकीपत्र डटकम
प्रकाशित मिती: २०८२ असार २५, बुधबार १४:०१

म्याग्दीको रघुगंगा गाउँपालिकाको दुर्गम र ग्रामीण बस्तीमा इन्टरनेटको पहुँच विस्तार भएको छ । सञ्चारको सहज पहुँच नपुगेका गाउँ बस्तीमा तीब्र गतिको फाइबर इन्टरनेट सेवा पुगेपछि स्थानीयबासी खुसी भएका छन् । चालु आर्थिक बर्षमा रघुगंगा गाउँपालिका– ६ पाखापानीको रायखोर, मुलपानी र उल्लेरी लगायतका बस्तीमा इन्टरनेटको सुविधा पुगेको छ ।

यस बर्ष पालिकाबाट प्राप्त भएको बजेटबाट वडा कार्यालयले रु ७ लाख बजेटको इन्टरनेट विस्तार योजना छनौट गरेको थियो । समुदायको समेत थप रु ७ लाख रकम साझेदारीमा रायखोर, मुलपानी क्षेत्रका ५८ घरधुरीमा इन्टरनेटको पहुँच पु¥याईएको उपभोक्ता समितिका अध्यक्ष ओमकुमार शेरपुजा मगरले जानकारी दिनुभयो ।
इन्टर विस्तारको लागि गाउँसम्म करिब साढे ७ किलोमिटर दुरीमा प्राइम नेटवर्क प्रा.लि.ले मुख्य फाइबर तार तानेपछि पालिका र समुदायको साझेदारीमा इन्टरनेट वितरण तार र इन्टरनेटका मेसिन तथा उपकरणहरु खरिद गरिएको उहाँले बताउनुभयो । वडा कार्यालयले तीन बर्षदेखि सूरु गरेको ग्रामीण बस्तीमा इन्टरनेट विस्तार अभियानले यस बर्ष पूर्णता पाएको छ ।

पहिलो र दोस्रो बर्षमा रु ६ लाख ५० हजारका दरले बजेट विनियोजन भएको र यस बर्ष ७ लाख बजेट गरी कुल २० लाख बजेट वडाका टोल बस्तीमा इन्टरनेटको पहुँच र सुविधा विस्तारमा लगानी भएको वडा अध्यक्ष मनकुमार शेरपुजा मगरले बताउनुभयो । यस वडाका सबै बस्ती र टोल इन्टरनेटको पहुँचमा पुगेको वडा कार्यालयले जनाएको छ ।

‘‘ कतिपय टोल र बस्तीमा मोवाइल फोनको पनि सहज पहुँच थिएन, हामीले आधुनिक सूचना प्रविधिको पहुँचलाई टोल टोलमा पु¥याउन अभियान थालेका थियौँ, यो बर्ष वडाभरी नै इन्टरनेटको पहुँच पु¥याउने योजनाले पूर्णता पाएको छ, सरकारी बजेटकै हाराहारीमा समुदायको समेत साझेदारीले योजनाले पूर्णता पाउन सहज भएको हो’’– वडा अध्यक्ष शेरपुजाले भन्नुभयो । उहाँका अनुसार, पाखापानीका विभिन्न टोल बस्तीमा करिब तीन सय घरमा इन्टरनेट जडान भैसकेको छ ।

प्राइम नेटवर्कले कम्पनीका म्याग्दी शाखा प्रमुख गोविन्द पौडेलले हरेक घरमा ५० एमबिपिएस देखि तीन सय एमविपिएस क्षमताको इन्टेरनेट सुविधा पुगेक बताउनुभयो । भौगोलिक विकटता र वन जंगलको कारण ग्रामीण भेगमा इन्टरनेट सूविधा विस्तार जटिल रहेको अवस्थामा कम्पनीले ग्रामीण क्षेत्रलाई प्राथमिकता दिएर इन्टरनेट विस्तार गर्ने योजनामा वडा, गाउँपालिका र स्थानीयबासीसंग सहकार्य गरेको उहाँको भनाई छ । । इन्टरनेटको स्पिडअनुसार बार्षिक १० हजार देखि १३ हजार ७०० सम्मको शुल्क निर्धारण गरिएको छ ।

रघुगंगा गाउँपालिकाको वडा नम्बर ८ मा समेत यस बर्ष इन्टरनेट विस्तार भएको छ । मोवाइल फोनको समेत सहज पहुँच नभएका गाउँ बस्तीहरुमा इन्टरनेट पुगेपछि स्थानीयबासीमा खुसीयाली छाएको छ । चालु आर्थिक बर्षमा गाउँपालिकाबाट विनियोजन भएको रु नौ लाख बजेट र समुदायको रु नौ लाख लागत साभेदारीमा यस वडाको घ्यासीखर्क, चौरखानी, दुवाढी, ढाँड, पात्लेखर्क, खरिबोट बस्तीका १३४ घरमा इन्टरनेट जडान गरिएको इन्टरनेट विस्तार उपभोक्ता समितिका अध्यक्ष केशब छन्त्यालले जानकारी दिनुभयो ।

बिहुकोट इन्टरनेट कम्पनीले गाउँसम्म फाइबर नेटको तार तानेपछि गाउँपालिका र समुदायको साझेदारीमा वितरण तार विस्तार र इन्टरनेटका उपकरणहरु खरिद गरिएको थियो । विद्यालय र स्वास्थ्य संस्थाहरुमा समेत इन्टरनेट जडान गरिएको छ । विद्यालयहरुमा इन्टरनेट सुविधा पुगेपछि विद्यालयमा प्रवृधिमैत्री शिक्षण सिकाईका लागि सहज हुने भएको छ भने इन्टरनेटका लागि कार्यालय प्रयोजन र व्यक्तिगत काममा मोवाइल डाटाबाट इन्टरनेटको प्रयोग गर्नुपर्ने बाध्यता र झण्झट समेत हटेको छ । मोवाइल टाडाको इन्टरनेटको गति सुस्त हुने र हरेक मोवाइल प्रयोगकर्ताले इन्टरनेटको लागि डाटामा लगानी गर्नुपर्दा खर्चिलो र झण्झटीलो हुँदै आएको थियो ।रासस