म्याग्दीको बेनी नगरपालिका–३, भकिम्लीमा लक्षित समूहका दुईसय १० जनालाई सामाजिक सुरक्षाभत्ता वितरण भएको छ । प्राईम कमर्सियल बैंक बेनी शाखा म्याग्दीमार्फत भकिम्लीको वडा कार्यालयबाट सेवाग्राहीलाई सामाजिक सुरक्षाभत्ता वापतको रकम प्रदान गरिएको हो ।
Advertisement
गएको आर्थिक वर्ष २०८१/०८२ को चौथो तथा अन्तिम चौमासिकवापत सरकारले तोकेको लक्षित समूहलाई सामाजिक सुरक्षाको रकम वितरण गरिएको प्राईम कमर्सियल बैंक बेनी शाखा म्याग्दीले जनाएको छ । सरकारले तोकेको मापदण्ड अनुसार तीन महिनाको एकमुष्ट प्रतिव्यक्ति ज्येष्ठनागरिकलाई १२ हजार, दलित ज्येष्ठनागरिकलाई पनि १२ हजार र विधुवा महिलालाई आठहजार रुपैयाँको दरले रकम वितरण गरिएको छ ।
Advertisement
यसैगरी अपाङ्गता भएका व्यक्तिलाई छ हजार चारसय र दलित बालबालिकालाई एकहजार छ सय रुपैयाँको दरले सामाजिक सुरक्षा भत्तावापतको रकम वितरण गरिएको छ भने लक्षित समूहलाई विरतण गरिएको रकम तीन महिनाको एकमुष्ट रहेको वडा कार्यालयले जानकारी दिएको छ । बैंकले वडा कार्यालयसँगको समन्वयमा भत्ता वितरण गरेको हो । भकिम्लीका सेवाग्राहीलाई प्राईम कमर्सिलय बैंकको कर्जा विभाग प्रमुख शिवप्रसाद सुवेदी, क्यासियर पुजा भट्टराई र कार्यालय सहायक सुजतासिंह ठकुरीले भत्ता वितरण गर्नुभएको थियो ।
बेनी नगरपालिका वडानम्बर ३ मा ज्येष्ठनागरिक ३ सय ३४, दलित ज्येष्ठनागरिक २६, ज्येष्ठनागरिक एकल महिला २९, विधुवा महिला ६०, अपाङ्गता भएका २८, दलित बालबालिका ३६ र नयाँ थप ४ जना गरी कुल ५ सय १७ जना सेवाग्राहीहरुले सामाजिक सुरक्षाभत्ता पाउने गरेको वडा सचिव मोहमद शाकिब रेजा अन्सारीले जानकारी दिनुभयो । कार्यक्रममा ३ नम्बर वडाका वडा अध्यक्ष पदमबहादुर पुनको पनि विशेष उपस्थिति रहेको थियो ।
वडा कार्यालयबाटै सरकारले उपलब्ध गराएको सामाजिक सुरक्षावापतको रकम बैंकमार्फत हातमै थाप्न पाउँदा सेवाग्राहीहरु भने दङ्ग परेका छन् । वि.सं. २०५१ सालमा नेकपा एमालेका तत्कालीन महासचिव मनमोहन अधिकारीको नेतृत्वमा बनेको देशको पहिलो कम्युनिष्ट सरकारले नेपालमा सामाजिक सुरक्षाको कार्यक्रम ल्याएको हो ।
