नेपाली कांग्रेस म्याग्दीबाट उम्मेदवार बनेका कर्ण बहादुर भण्डारी (केबी) ले सोमबारदेखि धवलागिरी गाउँपालिकामा चुनावी अभियान सुरु गर्नुभएको छ । आगामी फागुन २१ गते हुने प्रतिनिधि सभा सदस्य निर्वाचनका लागि धवलागिरी–७, धारापानी, ताकम हुदै लुलाङ, लम्सुङ क्षेत्रमा मतदातालाई लक्षित गरी चुनावी अभियान सञ्चालन गर्नुभएको छ ।
Advertisement
मतदाता भेटघाट तथा निर्वाचन परिचालन समितिको अभियानमा केन्द्रित भण्डारीले जनताको सेवाका लागि आफ्नो उम्मेदवारी रहेको बताउनुभयो । पश्चिम म्याग्दीमा भइरहेको विकास निर्माणमा पार्टी सभापति खमबहादुर गर्बुजाले प्रतिनिधिसभा सदस्य तथा राज्यमन्त्रीको योगदानलाई नजिकबाट हेरेको बताउँदै म्याग्देली जनताले महसुस गर्ने गरी काम गर्ने प्रतिबद्धता जनाउनुभयो ।
’जेनजी आन्दोलनले सभापतिको प्रतिनिधिसभाको कार्यालकाय पूरा हुन पाएन, यसपटक मैले उहाँको अपुरो कामलाई पूर्णता दिनका लागि तपाईहरुको साथ माग्न आएको छु’ उम्मेदवार भण्डारीले भन्नुभयो । म्याग्दीमा राज्यमन्त्री हुदाँ छोटो समयमा सभापति गर्बुजाले बजेट ल्याउन खेलेको भूमिकालाई पूरा गर्न र केही नयाँ योजनामा काम गर्न समेत कांग्रेसको विजय आवश्यक रहेको भण्डारीको भनाई थियो ।
धवलागिरीको गूर्जामा हिमपात भएका कारण अर्को कार्यतालिका बनाएर जाने गरी हाल लुलाङ, मुदीसम्म पुग्ने योजना रहेको नेपाली कांग्रेस म्याग्दीका पूर्व सभापति एवम् निर्वाचन परिचाल समितिका संयोजक रेशमबहादुर बानियाँको भनाई छ । उम्मेदवार भण्डारीले जिल्लाका विभिन्न गाउँ तथा टोल–टोलमा पुगेर मतदातासँग प्रत्यक्ष संवाद गर्दै त्यहाँका समस्या, गुनासा र अपेक्षालाई समेटेर मतदाता लक्षित प्रतिबद्धतापत्र समेत बनाइरहनुभएको छ ।
