फागुन २१ गते हुने प्रतिनिधि सभा सदस्य निर्वाचनको लागि म्याग्दीबाट नेपाली कांग्रेसको रुख चिन्हबाट उम्मेदवार बनेका कर्णबहादुर (केबी) भण्डारी म्याग्देली जनताको मन मनमा बस्न सफल सहयोगी र निश्कलंक व्यक्ति हुनुहुन्छ । गाउँको गोठमा जन्मिएर जापान र हङकङमा समेत जागिर गरी देश फिर्ता भएपछि राजधानी काठमाण्डौंमा प्राविधिको अनुसन्धान र खोजीमा लागेका भण्डारी पछिल्लो एक दशक यता जिल्लामा नै बसेर जनताको सुख दुखमा काँध थाप्दै आउनुभएको छ ।
Advertisement
कानुन,प्रशासन र प्रविधिको विषयमा जानकार भण्डारी २०४३ सालमा नेपाल विद्यार्थी संघको सदस्यता लिएर नेपाली कांग्रेसको अभिभावकत्वलाई आत्मसाथ गर्दै रोजगारीका लागि जापान र हङकङमा पुग्नुभयो । हङकङमा बस्नका लागि आफूले प्राप्त गरेको आइडीलाई समेत त्यागेर २०५१ सालमा नेपाल फर्किएका भण्डारीले आर्थिक स्थिति बलियो बनाउन व्यवसाय र समाजसेवाका लागि राजनीतिमा आवद्ध हुनुभयो ।
कानुन विषयमा स्नातक गर्नुभएका भण्डारी २०६८ सालदेखि नेपाली कांग्रेसमा सक्रिय रुपमा लागेर म्याग्दीका विकट गाउँवस्तीहरुलाई विकासको उज्यालोले उजिल्याउने प्रयासमा अनवरत संघर्ष गरिरहनुभएको छ ।
२०२५ सालमा रघुगंगा गाउँपालिकाको वडा नं २ मा पर्ने भगवतीको रुइसे गोठमा जन्मिनुभएका भण्डारीले ग्रामीण क्षेत्रका गरिब र अवसरबाट वञ्चित भएका व्यक्तिहरुको अवस्थादेखि लिएर देश विदेशका सहरमा सम्पन्न जीवन शैली विताइरहेका व्यक्तिहरुको व्यवस्थालाई पनि नजिकबाट बुझ्नुभएको छ ।
२०६६ सालमा नेपाल नागरिक उड्यन प्राधिकरण बोर्डको सदस्यमा मनोनयन भएर काम गर्नुभएका भण्डारी अनुभव र संंघर्षले खारिएको पाको व्यक्ति हुनुहुन्छ । २०६३ सालदेखि नेपालका चर्चित वैज्ञानिक द्धय राम र लक्ष्मण रिमाललाई साथमा लिई भोटिंग मेसिनदेखि घरायसी सुरक्षाका उपकरणहरु बनाएर नेपालीहरुलाई ठूलो गुन लगाउनुभएको छ । उहाँले नेपालमा नै पहिलो पटक विकास गरेको अनलाइन भोटिगं मेसिन अहिले नेपालका विभिन्न निर्वाचनहरुमा प्रयोग भइरहेको छ ।
बुबा शान्ताबहादुर भण्डारी र आमा नैनकली भण्डारीको कोखबाट जन्मनुभएका कर्णबहादुर भण्डारी के वि भण्डारीका नामले चिनिनुहुन्छ । बुबा क्षेत्री र आमा मगरसमुदायकी चेली भएकोले भण्डारीलाई यहाँका मगर समुदायले के वि भान्जा भनेर बोलाउने गर्दछन् । के वि भण्डारी २०७९ सालको संसदीय निर्वाचनमा नेपाली कांग्रेसका उम्मेदवार खमबहादुर गर्बुजा (खम्वीर) लाई जिताउन अहोरात्र खटेर म्याग्देली जनहरुको मन जित्न सफल हुनुभएको थियो ।
२०७० सालको दोस्रो संविधान सभाको निर्वाचन र २०७४ सालको प्रतिनिधि सभाको निर्वाचनमा केन्द्र र प्रदेशसँग समन्वय गरेर निर्वाहा गर्नुभएको भूमिका म्याग्देली जनताका लागि अविश्मरणीय छ । म्याग्दीको विकास र समृद्धिलाई सुशासनका लागि युवा पुस्तालाई साथमा लिई जिल्लालाई विकासले हराभरा बनाउने र म्याग्देली जनताको मुहारलाई विकासको उपहार दिई हसिलो बनाउने उद्धेश्यले प्रतिनिधि सभा सदस्यको निर्वाचनमा नेपाली कांंग्रेसबाट उम्मेदवार बन्नुभएको छ ।
व्यक्तिगत सुख सयल, इच्छा र चाहनाहरुलाई म्याग्देली जनताको विकास र समृद्धिको सपनासँग जोडेर म्याग्दीकै माटोमा विकासको मूल फूटाइ विकट र निकटका जनतालाई सँगसँगै हिडाउने महान उद्धेश्य लिनुभएका हसिँला र फरासिला स्वभावका भण्डारीले रुख चिन्हमा मतदान गरी आफूलाई विजयी बनाउन जिल्लावासीहरुलाई हार्दिक अनुरोध गर्नुभएको छ ।
विकासप्रेमी नेता भण्डारीले गरेका कामका बारेमा म्याग्देली मतदाता प्रष्ट छन् ।
अत्यन्तै दयालु र सहयोगि भावना भएका भण्डारीले गाउँघरमा पुगेर जनताको समस्या र आवश्यकतालाई पूरा गर्न अहिलेसम्म खेलेको भूमिकाकै कारण यसपटक सहरदेखि ग्रामिण क्षेत्रसम्मका मतदाता उहाँलाई मतदान गर्न उत्साहित छन् । जनताको सेवक बन्ने भण्डारीको प्रयास र सक्रियतालाई आगामी फागुन २१ गते हुने प्रतिनिधिसभाको निर्वाचनमा रुख चिन्हमा मतदान गरी थप पुष्टी गर्न म्याग्देली जनता आतुर छन् ।
