संसद् विघटन हुनुकाे कारण प्रचण्ड हुन् : ओली

शिखर समाचार
प्रकाशित मिती: २०७९ कार्तिक २१, सोमबार १७:०६

पोखरा । नेकपा एमाले अध्यक्ष केपी शर्मा ओलीले तत्कालीन नेकपा अध्यक्ष पुष्पकमल दाहाल ‘प्रचण्ड’ले जनादेशको अनादर गरेपछि संसद् विघटन गर्नुपरेको दाबी गरेका छन्।
सोमबार (आज) पोखरामा आयोजित एमाले बृहत् अगुवा कार्यकर्ता भेलामा अध्यक्ष ओलीले उक्त आरोप लगाएका हुन्।

‘माओवादी र हामी मिलेर संयुक्त घोषणापत्र ल्याएका थियौँ। प्रचण्डले त्यसलाई अनादर गरेपछि ताजा जनादेशमा जानुपर्ने अवस्था बनेको हो,’ ओलीले भने ।

उनले शेरबहादुर देउवा नेतृत्वको सरकारले अदालत पुगेर सरकार खोस्ने, बनाउने काम गरेकाले संविधानको धज्जी उडाएको बताए।

उनले भने, ‘मलाई संविधान मासेको आरोप लगाइएको छ। तर संविधान मास्ने काम शेरबहादुरजीकै नेतृत्वमा भयो ।’ गठबन्धनले सर्भेका नाममा एमाले काँग्रेसको हाराहारी मात्रै छ भनेर भ्रम फैलाएको ओलीले आक्षेप लगाए।

ओलीले भने, ‘आगामी चुनावमा काँग्रेस र एमालेले हाराहारी सिट ल्याउँछन् भनेर गठबन्धनले भ्रम फैलाउन खोजेको छ। विभिन्न सर्भेका नाममा यस्तो भ्रमपूर्ण प्रचार भइरहेको छ ।’

ओलीले आगामी चुनावमा एमाले काँग्रेसभन्दा धेरै अगाडि पुग्ने दाबी गरे। एमालेले एकल बहुमत ल्याएर बहुमतकै सरकार बनाउने उद्घोष उनले गरे।