निर्वाचनलाई ध्यानमा राखेर भारतसंग जोडिएका सुदूरपश्चिम प्रदेशका सिमा नाका नाकाहरु तीन दिन बन्द हुने भएका छन् । प्रतिनिधि र प्रदेश सभा निर्वाचनलाई स्वतन्त्र, निष्पक्ष, शान्तिपूर्ण एवं भयरहित बतावरणमा सम्पन्न गर्नका लागि मंसिर १ गते राती १२ बजे देखी सीमा नाका तीन दिन बन्द जिल्ला प्रशासन कार्यालयले सुचना जारी गरेका छन् ।
Advertisement
कैलालीसँग जोडिएको नेपाल भारत सीमानाका प्रतिनिधि तथा प्रदेश सभा सदस्य निर्वाचनका लागि मङ्सिर १ गते राति १२ बजेदेखि बन्द हुने भएको छ । निर्वाचन सुरक्षालाई सुदृढ बनाउनका लागि स्थानीय प्रशासनले तीन दिनसम्मका लागि नाका बन्द गराउन लागेको जनाइएको छ ।
मङ्सिर ४ गते राति १२ बजेसम्म नाका बन्द रहने जिल्ला प्रशासन कार्यालयका सूचना अधिकारी शिवराज जोशीले जानकारी दिनुभयो । कैलालीमा नेपाल–भारत सीमानाका १०१ किलोमिटर रहेको छ । निर्वाचनलाई स्वच्छ, पारदर्शी, स्वतन्त्र, मर्यादित र भयरहित वातावरणमा सम्पन्न गर्नका लागि नाका बन्द रहने जोशीले बताउनुभयो ।
झुलाघाट नाका तीन दिन बन्द
बैतडी समाचारदाताका अनुसार भारतसँग सीमा जोडिएको झुलाघाट नाकामा तीन दिन (७२ घण्टा)का लागि आवागमन बन्द हुने भएको छ । प्रतिनिधि तथा प्रदेश सभा निर्वाचनलाई लक्षित गरेर अन्तर्राष्ट्रिय सीमानाका बन्द हुने भएको हो ।
मङ्गलबार सूचना जारी गर्दै जिल्ला प्रशासन कार्यालय बैतडीले प्रतिनिधि तथा प्रदेश सभा निर्वाचन २०७९ लाई स्वतन्त्र, निष्पक्ष र भयरहित वातावरणमा सम्पन्न गर्न भारतसँग सीमा जोडिएको झुलाघाट नाकासहित सम्पूर्ण सीमानाका मङ्सिर १ गते राति १२ः बजेदेखि मङ्सिर ४ गते राति १२ः बजेसम्म बन्द हुने जनाएको छ ।
यसैबीच जिल्ला प्रशासन कार्यालय बैतडीबाट प्रदान हुँदै आएका अत्यावश्यकबाहेकका सबै सेवा बन्द भएको जनाएको छ । कार्यालयमा कार्यरत कर्मचारी प्रतिनिधि तथा प्रदेश सभा सदस्य निर्वाचनका लागि खटिएपछि २९ गतेबाट प्रशासन कार्यालयका सेवा बन्द भएको जिल्ला प्रशासन कार्यालय बैतडीले जनाएको छ । मङ्गलबार सूचना जारी गरेर प्रशासनले सेवा बन्द भएका जनाएको हो ।
प्रशासन कार्यालयका कर्मचारी निर्वाचनका लागि खटिएपछि कार्यालयमा जनशक्ति अभावले सेवा बन्द भएको जिल्ला प्रशासन कार्यालय बैतडीका सूचना अधिकारी खगेन्द्र भारतीले जानकारी दिनुभयो । अर्काे सूचना प्रकाशन नभएसम्मका लागि दैनिक सेवा प्रवाह रोकिएको उहाँले बताउनुभयो ।
