बैतडी जीप दुर्घटनामा डोटीका एक जनाको मृत्यु, दुई घाइते

शिखर समाचार
प्रकाशित मिती: २०७९ मंसिर ५, सोमबार १०:५३

दिपायल– बैतडीमा प्रहरी सवार जिप दुर्घटनामा डोटी घर भएका एक जनाको मृत्यु भएको छ भने दुई जना घाइते भएका छन् । दुर्घटनामा घाइते र मृत्यु हुने सबै प्रहरी दिपायल तालिम केन्द्रमा कार्यरत रहेको खुलेको छ ।

निर्वाचनमा खटिएको उक्त प्रहरी टोली सवार से १ ज ८५४ नम्बरको जीप आज बिहान ७ बजेको समयमा दुर्घटना भएको हो । जिल्ला सदरमुकाम बैतडी बाट पाटन तिर जान लागेको जीप दशरथचन्द राजमार्गमा पर्ने पाटन ४ स्थित थूम भन्ने स्थानमा दुर्घटना भएको हो । उक्त दुर्घटनामा ६ जनाको मृत्यु भएको र ७ जना घाइते भएको भन्ने समाचार बाहिरिएको छ ।

जिल्ला प्रहरी कार्यालय डडेल्धुरामा कार्यरत प्रहरी नैन सिंह कठायतका अनुसार दुर्घटनामा दिपायल तालिम केन्द्रबाट खटिएका ४ जना प्रहरीको मृत्यु भएको छ । मृत्यु हुनेमा दिपायल सिलगढी नगरपालिका–२ पुनेबाटाका प्रहरी सहायक हवल्दार अर्जुन कठायत रहेका छन् । उनीसँगै डडेल्धुरा घर भएका रमेश सिंह साउँद, कैलाली घर भएका लोक बहादुर बाठामगर रहेका छन् भने एक जना प्रहरीको सनाखत हुन बाँकी छ ।

दुर्घटनामा दिपायल सिलगढी नगरपालिका–२ बजारी रुम्टा घर भएका प्रहरी जवान गणेश खड्का र दिपायल सिलगढी नगरपालिका–१ तीखाका पुतली खड्का गम्भीर घाइते भएका छन् । प्रहरीका अनुसार उनीहरुको हेलिकप्टर मार्फत उद्धार गरेर थप उपचारका लागि नेपालगञ्ज लगिएको छ । दुर्घटनामा अन्य व्यक्तिहरु पनि घाइते भएको जनाइएको छ ।