दिपायल- शिखर नगरपालिकाले लैगिंक हिंसाविरुद्धको १६ दिने अभियान सुरु गरेको छ । “सभ्य समाजको पहिचानः लैङ्गिक हिंसा विरुद्धको अभियान” नारासहित हिंसाविरुद्ध महिला डेउडा प्रतियोगिताको आयोजना गरेर अभियानको सुरु गरिएको हो ।
Advertisement
डेउडा प्रतियोगितामा नगरका ११ वटै वडाहरुबाट प्रतियोगि टीम सहभागि रहेको महिला तथा बालबालिका शाखा प्रमुख सुमित्रा गुरुङले बताइन् । प्रतियोगितामा वडा नम्बर ६ को टीम प्रथम, वडा नं. २ को टीम दोस्रो र वडा नं. ३ को टीम तेस्रो भएको थियो । प्रतियोगितामा पहिलो, दोस्रो र तेस्रो हुने टीमलाई नगद सहित र अन्य सहभागी टीमलाई सान्त्वना पुरस्कार वितरण गरिएको उनले बताइन् ।
महिलाहरुले डेउडा गीत मार्फत आफ्ना पीडा वेदना पोखुन र लैङ्गिक हिंसा विरुद्ध गीत मार्फत नै एकअर्कालाई सचेत गराउन भन्ने उद्येश्यले प्रतियोगिता गरेर अभियानको सुरुवात गरिएको नगर उप–प्रमुख सुनिता रावलले बताइन् । अभियानको थालनीसँगै १६ दिनसम्म विभिद कार्यक्रम गरि लैङ्गिक हिंसा विरुद्धको अभियान मनाइने उनले बताइन् ।
कार्यक्रमकै बीच नगरका दुई जना संघर्षशील महिलाहरुलाई सम्मान गरिएको छ । लेखपढ नभए पनि व्यवसाय सञ्चालन गरेर आत्मनिर्भर भएको र महिला हिंसामा परेका व्यक्तिहरुका लागि वकालत र सहयोग गरेको भन्दै वडा नं. ६ की पार्वती बलायरलाई सम्मान गरिएको छ । त्यस्तै विवाह गरेको एक वर्षमै विधुवा भएर संघर्षशील जीवनयापन गर्दै आएकी वडा नं. ११ की पुनी बलायरलाई सम्मान गरिएको हो ।
