डोटी महासंघका पाँच जना पूर्व अध्यक्ष सम्मानित

शिखर समाचार
प्रकाशित मिती: २०७९ मंसिर २६, सोमबार १९:३३

दिपायल- नेपाल पत्रकार महासंघ डोटी शाखाका पूर्व सभापति एवं पूर्व अध्यक्षहरुलाई सम्मान गरेको छ । शाखाको १३औं वार्षिक साधारण सभाका अवसरमा महासंघको संस्थागत र सांगठनिक विकासमा योगदान पु–याएको भन्दै सम्मान पत्र र दोसल्ला सहित सम्मान गरिएको हो ।

महासंघका डोटी अछाम संयूक्त शाखाका पूर्व सभापति उद्वव सिंह ढाँट, एकल डोटी शाखाका प्रथम अध्यक्ष दिलबहादुर छत्याल, पूर्व अध्यक्षहरु टेकेन्द्र कुमार देउवा, मिन बम र योगेन्द्र बलायरलाई सम्मान गरिएको हो । डोटी अछाम शाखाका संस्थापक सभापति शंकर थापा लगायत संस्थापक पदाधिकारिहरुलाई यस अघिको कार्यकालमा सम्मान गरिएको थियो ।

डोटीमा पत्रकार महासंघको शाखा डोटी अछाम शाखाका रुपमा २०६० सालमा स्थापना भएको थियो ।

पूर्व सभापति र अध्यक्षसँगै अन्य संघ संस्थाहरुलाई पनि सम्मान गरिएको छ । जिल्लाका पत्रकारहरु र पत्रकारका परिवारका सदस्यहरुको उपचार निःशुल्क गर्दैआएकोमा सुजङ्ग अस्पताल राजपुरलाई सम्मान गरिएको थियो । त्यस्तै, नगर बसमा पत्रकारहरुलाई निशुल्क यात्रा गर्ने व्यवस्था गरेको र महासंघको भौतिक एवं संस्थागत विकासमा सहयोग गरेको भन्दै दिपायल सिलगढी नगरपालिका र शिखर नगरपालिकालाई सम्मिान गरिएको नेपाल पत्रकार महासंघ डोटी शाखाका सचिव पवन महराले बताए । त्यस्तै, महासंघको भौतिक एवं संस्थागत विकासमा सहयोग गरेकोमा केआइसिंह गाउँपालिका र सार्वजनिक सुनुवाइका लागि समन्वय गरेकोमा प्रादेशिक सुशासन केन्द्र पुन्नालाई सम्मान गरिएको उनले बताए ।

शाखाका अध्यक्ष मोहन शाहीको अध्यक्षतामा सम्पन्न कार्यक्रममा जिल्ला समन्वय समितिका संयोजक लक्ष्मण बहादुर सिंह प्रमुख अतिथि थिए । उक्त कार्यक्रममा दिपायल सिलगढी नगरपालिकाका नगर प्रमुख विजय खड्का, शिखर नगरपालिकाका नगर प्रमुख दिर्घ बलायर, उप प्रमुख सुनिता रावल लगायत जिल्ला अन्य कार्यालय र संघसंस्थाका व्यक्तिहरुले सम्बोधन गरेका थिए ।