माटो खन्ने क्रममा माथिबाट खसेको ढिस्कोले पुरिएर एकदशक अगाडी गम्भीर घाईते हुनुभएकी पर्वतको जलजला गाउँपालिका वडा नं २ पूर्णगाउँकी एक महिलालाई लायन्स क्लवले ४५ हजारभन्दा बढी आर्थिक सहयोग गरेको छ ।
लायन्स क्लव अफ बेनी मल्लाज, लायन्स क्लव अफ बेनी जलजलाले ४६ हजार ११० रुपैयाँ आर्थिक सहयोग संकलन गरी पीडित भगवती गौतमलाईको घरमा पुगेर हस्तान्तरण गरेको हो । आर्थिक अवस्था कमजोर रहेको अवस्थामा उपचार तथा अन्य खर्चमा सहज हुने गरी आर्थिक जुटाएर सहयोग गरिएको लायन्स क्लव अफ बेनी मल्लाजका कोषाध्यक्ष किरण कार्कीले बताउनुभयो ।
सहयोग हस्तान्तण कार्यक्रममा लायन्स क्लव मल्लाजका अध्यक्ष चन्द्रबहादुर क्षत्री, लायन्स क्लव बेनी जलजलाका अध्यक्ष नारायण पौडेल लगायतको उपस्थिती रहेको थियो । विश्वकै सबैभन्दा ठूलो सामाजिक संस्थाको रुपमा चिनिएको लायन्स क्लवले शिक्षा, स्वास्थ्य सहित सामाजिक क्षेत्रमा समेत सहयोग गर्ने गरेको छ ।
Advertisement
