म्याग्दीको बेनी नगरपालिकाको बैदेशिक प्रयोजनका लागि (विदेशका लागि अंग्रेजी) सिफारिस शुल्कमा परिमार्जन गरेको छ । १७ औँ नगरसभाका अवसरमा वडा नं. ७ का वडा सदस्य सोहन श्रेष्ठ विश्वासको प्रस्तावमा सभाले उक्त शुल्क एक हजार घटाएर अन्य सिफारिसको शुल्क पाँच सय बनाएको हो ।
Advertisement
हाल बेनी नगरपालिका वडा कार्यालयबाट विदेश जाने नागरिकका लागि अंग्रेजी सिफारिसपत्र तयार गर्दा रु. १००० सेवा शुल्क लिइँदै आएको छ । सदस्य श्रेष्ठले भन्नुभयो, वैदेशिक रोजगारी र अध्ययनका लागि जाने नेपालीहरूका लागि यो शुल्क केही महँगो र बोझिलो महसुस भइरहेको छ ।
विदेशमा जाने सेवाग्राहीले अक्सर धेरै कागजात तयार गर्नु पर्ने भएकाले यो शुल्क उनीहरूका लागि थप बोझिलो हुन्छ उहाँले भन्नुभयो ‘मलाई यो शुल्क निकै महंगो लागेको थियोे, विदेश जाने सबै आर्थिकमा सक्षम हुन्छन् भन्ने हुदैनन् आर्थिक अभावका करणले पनि कतिपय काम वडामा आएर रोकिने देखेर मैले यो प्रस्ताव नगर सभामा पेश गरेको हुँ ।’
सदस्यले गरेको प्रस्तावमा नगरप्रमुख सुरत केसीले उक्त शुल्कलाई घटाएर पाँच सय बनाउने प्रस्ताव सभामा पेश गर्नुभएको थियो । सभामा उक्त शुल्क घटाउने प्रस्ताव बहुमतले पारित गरेको थियो ।
सदस्य श्रेष्ठले यस अघिका नगरसभामा पनि यस्ता बिषयहरु उठान गर्दै आउनुभएको छ ।
