म्याग्दीको सदरमुकाम बेनीस्थित खुल्लामञ्चमा जारी २१ औं अन्तरमावि जिल्लास्तरीय जेसीज कप फुटबल प्रतियोगितामा न्यू वेष्ट पोइन्ट आवासीय मावि र माउण्ट एभरेष्ट आवासीय मावि प्रवेश गरेका छन् । शनिबार सम्पन्न भएको सेमिफाइनलमा न्यू वेष्ट पोइन्टले बेनी सामुदायिक माविलाई ०–२ गोल र माउण्ट एभरेष्टले हेम मावि सिवाङलाई पेनाल्टी सुटआउटमा पराजीत गर्दै फाइनलको यात्रा तय गरेका हुन् ।
माउण्ट एभरेष्टसँग निकै प्रतिस्पर्धात्मा खेल खेलेको हेम मावि सिवाङ पेनाल्टी सुटआउटमा पराजय भएको हो । प्रतियोगितामा उपाधीको लागि फाइनलमा प्रवेश गरेका दुबै टिमको खेल आइतबार ११ बजे हुने म्याग्दी जेसीजका महासचिव कुमार बानियाँले जानकारी दिुभयो ।
न्यु वेष्ट प्वाइन्टका कप्तान समन थापा र माउण्ट एभरेष्टका कप्तान सनम विकले जारी प्रतियोगितामा उत्कृष्ट खेल देखाइरहेका छन् । समन सर्वाधिक गोलकर्तामा अग्रस्थानमा छन भने सनमले पच्छाइरहेका छन् । दुबै विद्यालयका कप्तानले आफ्नो टिमलाई समाल्दै खेलेकाले फाइनल निकै रोचक हुने निश्चित छ ।
बुधबारदेखि सदरमुकाम बेनीको खुल्लामञ्चमा जारी प्रतियोगितामा २३ टिमको सहभागिता रहेको थियो । प्रतियोगितामा बिजेता विद्यालयलाई रनिङ शिल्ड, ट्रफि, मेडल र प्रमाणपत्र सहित नगद रु ५२ हजार २२२ र उपबिजेतालाई ट्रफि, मेडल र प्रमाणपत्रको साथमा नगद रु ३२ हजार २३२ पुरस्कार प्रदान गरिनेछ । अन्तर माविस्तरीय फुटबल प्रतियोगिताले विद्यालयस्तरमा लुकेर रहेको खेल प्रतिभालाई उजागर गराउन महत्वपूर्ण भूमिका खेल्दै आएको छ ।
Advertisement
