गलेश्वर बजार अब सिसिटिभी क्यामेराको निगरानीमा

गण्डकीपत्र डटकम
प्रकाशित मिती: २०८० माघ १२, शुक्रबार १२:१४

म्याग्दीको बेनी नगरपालिका–९ गलेश्वर बजार अब सिसिटिभी क्यामराको निगरानीमा रहने भएको छ । गलेश्वर शिवालय क्षेत्र विकास कोष र पुलत्स्य पुलह अन्न क्षेत्रको लगानीमा बजारको मुख्य ६ ठाउँमा क्यामरो जडान गरिएको छ । रु दुई लाख ५१ ह्जार लगानीमा बजार प्रवेशद्धारदेखि राहुघाट पुल सम्मको क्षेत्रलाई अब क्यमराबाट निगरानी राखिने छ ।

उक्त जडान गरिएको क्यामराको उद्घाटन गर्दै प्रमुख जिल्ला अधिकारी लक्ष्मण ढकालले प्रविधिको प्रयोगले अपराध न्युनीकरण र अनुसन्धानमा सहयोग हुने बताउनुभयो । गलेश्वर शिवालय क्षेत्र विकास कोषका कार्यालय सचिव राम बानियाँका अनुसार क्यामराको गलेश्वर प्रहरी चौकीबाट निगरानी गर्ने व्यवस्था मिलाएको छ ।

कोष र अन्नक्षेत्रले आधा आधा खर्च ब्यहोर्ने गरि क्यमरा जडान गरिएको अन्नक्षेत्रका अध्यक्ष ज्ञानेन्द्र सुवेदीले जानकारी दिनुभयो । गलेश्वर शिवालय क्षेत्र विकास कोषका अध्यक्ष माधवप्रसाद रेग्मीले मन्दिरमा भक्तजनले चढाएको भेटि परिचालन गरेर बजारको सुरक्षाका लागि सिसिटिभी राखिएको बताउनुभयो ।

सिसिटिभी र सडक बत्तीले स्थानीयबासी, म्याग्दी र मुस्ताङ जाने पर्यटकलाई सुरक्षित र सहज बनाएको बेनी नगरपालिका–९ का वडा अध्यक्ष चक्र केसीले बताउनुभयो । कोषले गत वर्ष रु. दुई लाख ३० हजार ७५० खर्च गरेर गलेश्वर बजारमा ५५ वटा सडक बत्ती जडान गरेको थियो । सडक बत्ती जडान गरेपछि बजारको सुरक्षाका लागि सिसिटिभि जडान गरिएको गलेश्वर क्षेत्र विकास कोषका उपाध्यक्ष बमबहादुर पुनले बताउनुभयो ।

सिसिटिभी मर्मत र सडक वक्तिको विद्युत महशुल पनि मन्दिरको आम्दानीबाट व्यवस्थापन गर्ने सदस्य सचिव बलबहादुर खत्रीले बताउनुभयो ।